Предыдущая публикация
"Конаков лудмаш-2023"
30 ноябрьыште Шернур район Кукнур кыдалаш школышто республик кӱкшытан "Конаков лудмаш" визымше гана эртаралте. Кум гана заочный формо дене эртен, ӱмаште икмыняр школ гыч участник-шамыч миеныт ыле. А тений Шернур (икмыняр школ), Советский, Кужэҥер, Параньга, У Торъял районла гыч лийыныт. Тунемше-влакын сочинений ден туныктышо-влакын методический разработкышт конкурслам ончылгоч акленыт гын, тунемше-шамыч коклаште марла да рушла почеламутым яндарын лудмо, тыгак тений А. Конаковын пьесыж почеш шындыме инсценировко-влакым модын ончыктымо номинаций-шамычым конференцийыш толшо-влак шке шинча дене ужын кертыныт. Ныл школ мастарлыкым ончыктен. Артист койышыштым аклыше-влак коклаште Марий самырык театрын актрисыже, Марий Элын сулло артистше Любовь Купсольцева лийын. Тиде номинацийым конференций кышкарысе конкурсыш пуртымо пешак лачеш толын. Вет кызыт Российыште "школ театр" проект илышыш пурталтеш. Адакше ончыкылык марий артист-влакым кушташ полшышо ик йӧнжӧ лач тыгай. Кукнур школлан марий театрла дене кылым умбакыже пеҥгыдемдаш сай ыле.
А шымлымаш паша-шамычым краевед, Марий Эл образованийын сулло пашаеҥже Анастасия Ивановна Глазырина шымлен лектын.
Мыланем марла лудшо-влакым таҥастарен, акым пуэн шинчаш логале. Ой, кузе сӧрал колышташ йочан лудмыжым! Южыжо ялт артист гаяк кертеш. Шернур посёлкысо Совет Ушем Герой В. Яналов лӱмеш 1-ше номеран кыдалаш школышто 10 классыште тунемше Анна Прохорова, У Торъял район Токтарсола школышто 8-ше классыште тунемше Родион Небогатиков, ик гана огыл тыгай конкурсышто шкеныштым тергат, ӧрын огыт шого. Изирак класслаште тунемше-влакат почеш огыт код - нунат кушкын шуыт. Ала-кудыжлан койышым ешарыман але чолгалыкым ончыктыман. Шке почеламутшымат лудшо лийын - Шернур районысо Шӱдымарий школ гыч Сергей Мамаев. А эшеат оҥай, кунам туныктышо-шамыч тунемшышт ончылно шкешт почеламутым сылнын лудыт. Нунат йоча семынак тургыжланат, вожылалыт, монден колтат... Теве Кукнур школ директор, самырык вуйлатыше Юлия Сергеевна Горинова, мутлан, шкеже руш, но ты кундемын шочшыжо, марла чыла умыла, кӱлеш гын, пелешта. "Конаков лудмашлан" лӱмынак марла почеламутым ямдылен. А воспитательный паша шотышто алмаштышыже Нина Леонидовна Ялтаева шке возымо почеламутшым каласкалыш. Шернур посёлкысо Совет Ушем Герой В. Яналов лӱмеш 1-ше номеран кыдалаш школышто кугыжаныш марий йылмым туныктышо Лилия Владимировна Волковат шке возымо почеламутшо дене куандарыш. Чон шуленак колыштна Советский районысо Ӱшнӱр кыдалаш школышто тӱҥалтыш классым туныктышо Татьяна Ильинична Ивановам. Тыгак рушла сылнын лудшо-влакат ятырын лийыныт. Пешак кӱлешан конкурс, тек тудо умбакыжат аралалтеш. Чылаже шым тӱрлӧ номинаций, 200 утла участник лийын. Конференцийыште А. Конаковын ӱдыржӧ, МАССР-ын сулло артистше Нина Конакова (21 ноябрьыште шочмыжлан 110 ий темын) нерген презентацият пайдале лийын шонем.
Пеледыш пайремлан негызым пыштыше, педагог да просветитель Александр Федорович Конаковын лӱмжым чапландарыме сомылым Кукнур школ шке кидышкыже икмыняр ий ончычак налын. Купсола школ петаралтме деч вара Конаковын бюстшым ты школ кудывечыш конден, уэмден вераҥденыт. Варажым шко тоштерын сылнымут залыштыже А. Конаковлан пӧлеклалтше пырдыжым келыштареныт. Ончыкыжланат шонымаш изи огыл, но чылажынат шке жапше.
"Конаков лудмаш" конференцийым эртарыше да тушко ушнышо-шамычлан кугу тау. Сеҥыше-влаклан Марий образований институтын да Кукнур кыдалаш школ вуйлатыше-влак Л. Овчинникова ден Ю. Горинован кидпалышт дене дипломым кучыктеныт.
Светлана Пехметова.
24:44
Следующая публикация
Нет комментариев