Предыдущая публикация
Кӱвар ынде огеш "лывырге"
Шернур район Кукнур кундемыште Кӱшыл Чисола ял калыкын куанжылан мучаш уке. Кок ял кокласе корем гоч кӱварым шукертак тӧрлыман ыле, но тидлан оксажат шагал огыл кӱлын. Сандене ятыр ий ял калык ты корно ужашым лӱдын-лӱдын вончен да кажне шошым ынде мушкынак волта манын ойгырен.
Теве ынде, пайрем ӱстел йыр чумырген, пырля куаныме тат толын шуын. Теҥгече пӱртӱсыштак шолтымо тутло лемышт дене пашазе-влакымат сийленыт, Сергей Толя чӱчӱн гармоньым шоктымыж почеш муралтенат колтеныт. А Кӱшыл Чисолаш, шочмо ялышкышт, каныш еда самырыкшат, кокла ийготанжат шукынак толыт. Тыште чон дене канат, ача-ава суртым кучаш полшат.
Ял калык Шернур район ден Кукнур ял шотан илем администрацийым вуйлатыше-влак ден, нунын полышкалышыштлан Марий Элнан ик эн мӱндыр ялыштыже илыше-влакым шотлымыштлан, тыгак пашазе-влаклан кугу таум ойла.
С. Пехметова
Т. Терехован фотожо
Следующая публикация
Комментарии 6