Предыдущая публикация
Кукнур кундемын кечыже - 17 сентябрьыште
Вес арнян, шуматкечын, Шернур районысо Кукнур кундем 29 гана пайремышкыже чумырга.
6 сентябрьыште Кукнур ял шотан илем администрацийыште мероприятийым ямдылыме шотышто оргкомитетын погынымашыже лийын. Оргкомитетын еҥже-влак Анатолий Конаков ден Валерий Мочаевын палемдымышт почеш, программе тӱҥ шотышто ончычсо гаяк (минифутбол дене турнир, баскетбол, шахмат, кирам нӧлтымаш, ял кокласе эстафете, "Шыже пазар", концерт) лиеш. Ик оҥай таҥасымашыжым мотоблокан оза-влак коклаште эртараш палемдыме.
Тиде идалык марий мер илышыште эше просветитель, драматург да туныктышо Александр Федорович Конаковын шочмыжлан 135 ий дене палемдалт кодеш. Тудын шочмо кечыже - 9 сентябрь. Пайрем кечын Кукнур кыдалаш школ ончылно верланыше бюстшо воктене шарнымаш программе лиеш.
"Российыште калык-влакын тӱвыра поянлыкышт идалык амал дене "Когыльо пайремымат" эртарат. Кукнур вел вате-влакын чесыштым авызлен аклаш кумылда уло гын, пайремыш мийыза. "Шыже пазарыште" тӱрлӧ чесым, ыштыш-ыштыш кучышым налашат, ужалашат толын кертыда.
"Кукнур кундемын кечыже" 10 шагатлан спортсмен, пашан ветеранже, лӱмлӧ еҥ-влакын парадышт дене почылтеш. А футбол да баскетбол дене 9 .30 шагатланак модаш тӱҥалыт.
Шочмо кундемнан пайремжым тӱвыргын эртарен колташ полышым пуаш шонышо-влак оргкомитетын еҥже-влак деке лекташ темлена.
Светлана Пехметова,
Кукнур землячествым вуйлатыше
С.Пехметова ден Д.Речкинын тӱрлӧ ийлаште ыштыме фотошт.
Следующая публикация
Комментарии 1