Марийское сообщество

Шорыкйол пайрем годым пелештыме мут!

А поро дене толын йӧратен лийын шого Ош Поро Кугу Юмо. А теве, идалыкын эн кужу йӱдым вучен шуктен тауштен ужатен колтенна, Эн кужу йӱд деч вара таче, икымше кугарня кечын мари калыкын чот вучымо да йӧратыме Шорыкйол пайрем толын шуын. А таче пайремышке толын да пайремнам йӧратен нал шого поро Шорыкйол Юмо! Шорыкйол Юмо дене пырля толын шого Поро Идалык Кугу Юмо! Тиде тичмаш мелнам тулыш чывыштал пыштен, тиде тичмаш корка гыч шонан пурам тулыш шыжыктен, марий калыкемлан родо шочшемлан, икшывемлан, йӧратыме ешемлан, поро пошкудемлан, кучымо вольыкемлан, ыштыме киндемлан перкем йодам. Тул Ава, тыйын шикшет кужу, йылмет пӱсӧ йоҥылыш ойлымемым, шонен шуктыде осалым ыштымемым Ош Поро Кугу Юмылан умылтарен намиен шукто, савырым ыштыже, пореш колтыжо Ош Поро Кугу Юмо, шонен кошмаште, йылме дене ойлымаште, шинча дене ончалмаште пашам ыштымаште, йӱмаш-кочмаште, да сулыкеш пурмо деч тичмаш аралтышым ыштен шого. Возын малыме годымат, кечывалым кынел коштем годымат кидем-йолемлан кап-кылемлан, вуй-шинчавылышемлан, тазалыкым пуэн шого. Уш-акылым ешарен шого. Кайыквусым, вольыкым ончаш, кинде-шурным кукташ, еш дене кылдалтше сомылым поро дене ышташ вий куатым пуэн шого. Таче неле илыш жапыште, тыныс верчын тыршаш полшен шого. Пелештыме мутем Шорыкйол Юмо йӧратен нал ашым ыштен шуктен шого! Пайрем кумылым кӱшкӧ кӱзыктен, кумдан шарен колто Ош Тӱняште. Алал лийже!!! #шорыкйол #пайрем #пелештымемут #онаеҥ #виталийголовин