Предыдущая публикация
Мин гомернең шундый бер чатында…
Ирексездән,
гел кызыл төс телим светофорга.
Йөгерә-йөгерә барган җирдән туктап,
торыр идем бүгенгемдә озак-озак…
Исем китми юлның аръягында
кемдер көткәненә.
Язмышымның иртәгәсе
алтын таулар вәгъдә иткәненә...
Тирә-юньдәгенең
эткәненә, төрткәненә,
чыш-пыш килеп гайбәт сипкәненә
исем китми…
Торыр идем
бүгенгемнең һәр мизгелен
тәмләп,
киләчәкне (хет хыялда!) ямьләп.
Битлегемне салып, үз-үземне табып,
Хак таләбен танып,
җан таләбен язып…
Әйе,
Гомернең мин шундый бер чатында... –
Гел кызыл төс телим светофорга.
Тик...
Дертләп куя йөрәк «сары»сыннан,
аннан «яшел» яна…
Һәм түз генә
бөтереп алган вакыт агышына...
Ялгышына, сагышына…
Сирень Якупова
Следующая публикация
Нет комментариев