🔹🔷🔹

● Мусулмон қардошим, бугун — кунлардан жума. Бу кунда қалбимиз сурури Пайғамбаримиз Муҳаммад соллаллоҳу алайҳи ва салламга салавот айтишни, Аллоҳ таолодан ўзингиз, оилангиз, яшаётган ўлкангиз ва бутун Ислом уммати учун хайрли дуолар қилишни унутманг. Чунки, Аллоҳ таоло бу кун ичида дуолар ижобат бўладиган лаҳзаларни яширган. Шояд сиз дуо қилган пайтингизда дуоларингиз ижобат бўлар-да, фойдангиз барчага тегар.
Айтмоқчи, ота‒онангизнинг дуосини олдингизми? Олмадингизми?! Олмаган бўлсангиз катта даромаддан қолибсиз‒ку! Зудлик билан уларнинг олдига кириб, дуоларини олинг!
Улардан олисларда яшаяпсизми?! Дарров қўлингизга телефонни олиб, уларга қўнғироқ қилиб, аҳволларидан хабардор бўлинг. Қийналаётган бўлсалар, уларга моддий ёрдамингизни аяманг! Ҳеч бўлмаса ширин сўзларингиз билан кўнгилларини кўтаринг! Олисдаги фарзандларнинг оғизларидан чиқаётган гапларини эшитиш, ота ва онани қанчалар севинтиришини биласизми? Ҳали ҳам кутаяпсизми, телефонингизни олиб, уларга қўнғироқ қилинг!
Уларнинг кўнглига ботадиган бирон гап оғзингиздан чиқмасин, Аллоҳга осий бўласиз!
Агар отангиз ёки онангиз ёхуд ҳар иккиси оламдан ўтган бўлса ва сиз эркак киши бўлсангиз, бориб қабрларини зиёрат қилинг ва ҳақларига жаннат ва мағфират тилаклари ила Аллоҳга дуо қилинг, уларнинг амаллари давом этсин. Чунки, оқил фарзанд − вафот этган ота ва онаси учун тинмай дуо қилган фарзанддир!
Аллоҳ оламдан иймон билан ўтган барча мўъминларни, жумладан, сизу бизнинг ота—оналаримизни раҳмат қилиб, Фирдавс жаннатларига киритсин!
Барчангизга ҳурмат билан Абу Жаъфар ал-Бухорий
Сизга илиндик