Mushuklar

Ramazon hayiti musulmonlarning eng ulugʻ ayyomlaridan biridir. U Ramazon oyi tugab, Shavvol oyi boshlanganida nishonlanadi. Ramazon hayiti “Iydul fitr” deb ham ataladi va roʻzaning tugashini bildiradi. Darvoqe, “iyd” soʻzi arab tilida “qayta-qayta takrorlanish”, “foyda-manfaat”, degan maʼnolarni anglatadi. Hayit bayrami har yili takror va takror kelgani va unda Alloh taoloning neʼmatlari bandalariga serob boʻlgani uchun “iyd” deb nomlangan. Baʼzi ulamolar: “Bu bayram insonlarga ularning qiyinchilik va gʻam-tashvishlariga qaramasdan har yili ularga xursandchilik va shodlik bilan qayta-qayta kelgani uchun “iyd” deb nomlangan”, deganlar. “Fitr” esa “ogʻiz ochish”, “taomlanishni boshlash” deganidir. Demak, “Iydul fitr” roʻzadan chiqib, taomlanishga oʻtish kunidir. Hayit kuni qayta tugʻilish ramzi hamdir.