ОРЗУ ва УМИД

Юртга шундай подшоҳ келса-ю,
Фақат бола боқса оналар.
Тул бўлмаса бирорта аёл,
Бўшаб қолса етимхоналар.
Юртга шундай подшоҳ келса-ю,
Кексаларга нон бўлса текин.
Чунки улар бугун ё эрта,
Сўнгги бор нон ейиши мумкин.
Юртга шундай подшоҳ келса-ю,
Пул демаса мактаб, боғчаси.
Газ, свети ўчмай ҳеч кимнинг,
Қайнаб турса доим декчаси.
Юртга шундай подшоҳ келса-ю,
Мусофирлар қайтса ватанга.
Йиғлаш учун топилмай сабаб,
Ош топилса ейман деганга.
Юртга шундай подшоҳ келса-ю,
Билим олиш пуллик бўлмаса.
Боласини ўқитолмайин,
Армон қилган ўзбек қолмаса.
Юртга шундай подшоҳ келса-ю,
Дориларнинг нархи чақмаса.
Онасини даволатолмай,
Ўғил жонин ўтда ёқмаса...
Беш қўлини оғзига бирдан,
Тиқмасалар шифокорлари.
Муҳтож ётган бемор пулига,
Сотмасалар номус–орларин.
Юртга шундай подшоҳ келса-ю,
Ҳар гўшамиз бўлса гулистон.
Минг йил ўсган чинорларини,
Этмасалар ер билан яксон!
Юртга шундай подшоҳ келса-ю,ч
Қоғозбозлик йўқ бўлса бирдан.
Фойдалансак солиқ тўламай,
Аллоҳ бериб қўйган шу ердан!
Юртга шундай подшоҳ келсин-у,
Ўз халқининг дуосин олсин.
Майли нима бўлса бўлсин-у,
Тинчлигимиз сақланиб қолсин !