Предыдущая публикация
ГЪАФЛЕТ САХРАСЫНДА
Я ДА ШАКИР СЕЛИМДЕН БИР ОГЮТ
Рахметли шаир Шакир Селим ери кельгенде шакъа этмеге, ери кельгенде джиддий лаф этмеге биле эди.
Сонъки йылларда Шакир агъа, хасталыкъ якъасына япышкъанда, даа чокъ джиддий мевзуларда къонушып, бир кунь яныкълай-яныкълай: «Исмаил Гаспринский айткъаны киби, гъафлет сахрасында серилип къалгъан бир миллет олдыкъ», – деп дердини тёкти.
Энди арадан он беш йыл кечти. Барып да Шакир агъа шимди сагъ олгъан олса, не дер эди? Биз даа бетер гъафлетте серилип къалмадыкъмы? Тыпкъы анавы къартал киби олдыкъ, бири солгъа, бири сагъгъа бакъа. Козьлер дёрт олды, коктен иляхий азыкъ тёкюледжегини беклеймиз. Я биз авдет йылларында Къырымгъа бакъып къайтмадыкъмы? Анги тараф бизге ярдым этти о вакъытта? Амма аякъ чокъ чалынды ве чалынмакъта. Биз исе ярмадай ярылдыкъ, батмасакъ да йылангъа сарылдыкъ… Бир-биримизге душман олдыкъ. Бир авуч халкъны беш-алты тарикъат, тюрлю сиясий кучьлер чеккелей бере. Шакир агъа сагъ экенде де ойле олгъан эди, амма ал-азырда вазиет феналашты.
Шашыладжакъ шей, тамыр халкъны сахте «медений мухтариет»нен сыйлагъан насылдыр эрифлер я да «сюргюнликни чокътан унутмакъ керек» деген манкъуртлар энди къач йылдан берли бутюн халкъ адындан чыкъышлар япа, тюрлю хаберлер васталарына изахлар (комментарийлер) берелер. Бу да етмегени киби, Къырымдаки телеканал якъында бир сюжетте учь-дёрт кере агъыз толдурып «русский Крым» ибаресини къулланды. Шу лафны озюни «миллий» дие таныткъан телеканал сёйлерми?! Меджбур этселер биле… Я да, дейик, тевкъиф этильген генчлеримизге гонъюльдешлик бильдирмей билесинъиз, амма сиз оларнынъ устюне чиркеф тёккенде шу чиркеф ичине башта кендинъиз батаяткъанынъызны анъламайсынъызмы? Адамларны алетке чевирип, бир-бирине устыралар. Биз исе гъафлетте къаламыз…
Сонъунда бир даа Шакир агъанынъ сёзлерини анъмакъ, бир огютини хатырлатмакъ истейим: бир иш япкъанда бугуньки куннинъ шуретинен дегиль де, япкъан ишиме элли йылдан сонъ насыл къыймет кесер экенлер деген фикирнен япмалы.
Иште, буны унутмайыкъ.
Сейран СУЛЕЙМАН
(«Янъы дюнья» газетасы)
Следующая публикация
Комментарии 3