ВАТАН

Кўзим очиб босган тупроқ,гулгун бўстонимсан Ватан,
Алла айтган онам каби бир меҳрибонимсан Ватан.
Мафтун этмас мени зарра ҳеч бир диёр ҳам сен каби,
Бу оламда ўзинг танҳо жаннатмаконимсан Ватан.
Сени менга Ватан қилиб яратганга шукрона дей,
Бошим узра ҳурлик нурин таратганга шукрона дей,
Халқ дардига ўз меҳрини қаратганга шукрона дей,
Зафар кутган йўлларимда нурли имконимсан Ватан.
Юртим дебон не Фарҳодлар йўлларингга жонин тутди,
Йироқларда ҳатто Бобур фироқингда қонлар ютди,
Ҳурлигингни кутиб ҳар он Чўлпонларинг йиғлаб ўтди,
Қайда бўлмай кўзим нури ,ёруғ жаҳонимсан Ватан.
Тупроғингдан олтин олар деҳқонларинг мардонавор,
Саховатда ҳотам каби кадди баланд Туронинг бор,
Билмам яна қайда учрар бу оламда шундай диёр,
Худо шоҳид фақат ўзинг ёлғиз посбонимсан Ватан.
Она-юртим сени суйган ҳар юракка байроқ ўзинг,
Кўзга суртай тупроғингни меҳригиё тупроқ ўзинг,
Ҳур элимнинг қалбига нур таратгувчи чироқ ўзинг,
Тирикдирман сен-ла чунки тандаги жонимсан Ватан.
НИЛУФАР ТОҲИРОВА https://t.me/Nilufar_Tohir_ijodi