Предыдущая публикация
*Мен ногайдынъ баласы*
Мен ногайдынъ агаш бесик ишинде
Тартпа мынан тарттырылган баласы,
Мен ногайдынъ кум ойнаган шоьлинде
Апыл-тапыл аяк баскан баласы.
Мен ногайдынъ кийгиз тоьри уьстинде
Оьрнегинде оьнер коьрген баласы,
Мен ногайдынъ куржын тойы ишинде,
Йырын тынълап, йыршы болган баласы.
Мен ногайдынъ камыс япкан уьйинде,
От теперип, оьтпек салган баласы,
Мен ногайдынъ, сары танъда сапырып,
Сары майлы шайын ишкен баласы.
Мен ногайдынъ, йылкыларын йылгыртып,
Йылы сувга айдап тоьккен баласы,
Мен ногайдынъ, ак юнлери мамыктай,
Ак койларын яйып баккан баласы.
Мен ногайдынъ, камышы алып колыма,
Ат белине каргып минген баласы.
Мен ногайдынъ байрамлары арада
Яркыратып ятлав айткан баласы.
Мен ногайдынъ, данъылларын тегислеп,
Телбигеди берк ыслаган баласы.
Мен ногайдынъ, казгыр алып колыма,
Кара кыста кый авдарган баласы.
Мен ногайдынъ боьригоьзли шоьлинде,
Боьри коьрип, туьбек алган баласы.
Мен ногайдынъ турна конган коьлинде
Тырымтайдай анъшылаган баласы.
Мен ногайдынъ кырк баьтири арада
Кырк биринши болгым келген баласы.
Мен ногайдынъ эртенъгиси акында
Эрте-кеши ойланаган баласы.
Мен ногайдынъ, ана шоьлди калдырып,
Ак Кобанга келин болган баласы.
Мен ногайдынъ, анша-мунша койдырып,
«Бир ногаймыз!» – деп юреген баласы.
Мен ногайдынъ ян сызлаган куьнлерде,
Яным ногай деп, кайгырган баласы.
Мен ногайдынъ: «Коьтерши», – деп туьнлерде,
Ак Алламга тилек салган баласы.
Мен ногайдынъ юз мынъ арка арада
Тал шыбыктай турагалган баласы.
Юз мынъ ногай, Ин Ша Аллах, биригип,
Бир болар деп, уьмит эткен баласы.
Зухра Булгарова.
Следующая публикация
Комментарии 7