Предыдущая публикация
Тений ты пайремлан чывылалт лекташ Йошкар-Олаште, Изи Какшан эҥерыште, ий вичкыж улмылан кӧра лӱмын вакым ыштен огытыл.
Сандене кумылан-влак ола деч ӧрдыжтӧ верланыше памаш-влак деке коштыныт. Мутлан, Советский районысо Шабашаныште гын, вӱдым налаш черетше пеш кужу лийын, кок шагат наре шогашат логалын, увертарат соцкыл лаштыклаште.
Кеч Йошкар-Олаштыже Вознесений черке воктеке, Изи Какшан эҥерыште черке пашаеҥ-влак ырес сынан вакым кажне ийын ыштат да вӱдым шнуяҥдыме йӱлам эртарат. А святой вӱдшым черке кудывечыштак темкален пуэденыт.
Шернур районысо Тиман почиҥга ял воктенысе памаш вӱдым Марисола черкын пашаеҥже-влак шнуяҥденыт. Чывылалташ да вӱдым налаш шонышо-влак тыгак шукын лийыныт, эсогыл Киров кундем гычат толыныт.
Мо оҥайже, пайрем вашеш купель кумдыкшым ӱдырамаш ден пӧръеҥ-влаклан посна чывылалт лекташ келыштареныт. Тиде пашам шукташ верысе икмыняр предприятийын вуйлатышыже-влак полшеныт.
Волжский районышто Пӧтъял, Сотнур черкыла пеленысе памашлаште келыштарыме купельыштат вӱдыш пурышо-влак шукын лийыныт. Эшежым игечыжак ты йӱлам шукташ полшен манаш лиеш, леве лийын.
Снимкыште: Крешене кечын Вознесений черке кудывечыште
М. Скобелевын фотожо газетамарийэл.рф/kreshene-vӱdlan-pamashysh/
Следующая публикация
Нет комментариев