Предыдущая публикация
У ий – у шонымаш
Лидия ИКСАНОВА, поэт:
– 2025 ийлан мыйын шонымашем пеш кугу. Кызыт марте 11 сборникем уло гын, эше 3 книгам лукташ ямде улам. Йоча-влаклан «Йошкар-Оласе пырыс-влакын йомакышт» книга рушла возымо лиеш. Марий экскурсовод-влаклан, турист-шамычлан каласкалашышт оҥайрак лийже манын, шукертак мутым пуэнам «Царевококшайские новеллы» книгам ямдылаш. Йошкар-Олаште улшо тӱрлӧ ойыртемалтше верла нерген возем. Мутлан, мемнан уло Чарла кремль, Москвасе гае Спасский башне, Вараксин кӱвар, купеч-влакын тошто пӧртышт аралалт кодыныт. Кажныжлан ик новеллым пӧлекленам. Южышт мистике, южышт фантастике сынан улыт, эше ик гана ойлем, нуно турист-влаклан келшыше, но тыгодымак историй дене кылдалтше улыт.
Вес поэзий сборникем «Вселенная по-имени Любовь» манын лӱмденам. Тушто марла-рушла, тыгак англичан йылмышке кусарыме почеламут-влак пурталтыныт. Нуно ямде улыт. Тиде проект кугурак. Англичан йылмыш шуко ий йот йылмым туныктышо Рима Яковлева кусарен.
Икмыняр йоча пьесем уло. «Ош лудо», «Марика» йоча музык, «Эрвика ден Рамазан» лирике трагедий пьесе-влак да кок драме: «Сусыр кайык» да «Овда». Поснак палемден кодынем «Эрвика ден Рамазан» пьесым, тудо почеламут дене возымо, Уильям Шекспирын произведенийжын ритмикыжым кучылтмо, Ромео ден Джульетта кокласе йӧратымаш гай историй ончыкталтеш, но действий Йошкар-Олаште эрта.
«Овда» пьесым драматург-влакын конкурсышкышт пуэнам ыле, но тудо палемдалтде кодын. Мый руш йылмыш кусаренам да ынде Россий кӱкшытан конкурсыш пуаш шонем. Пеш крутой пьесе лийшаш (воштылеш – авт.)!
Сценышке подростко-шамыч нерген спектакльым ала-молан йӧршынат огыт ончыкто. А моткоч кӱлеш! Тиде шонымаш денак «Марика» пьесем возалтын.
Шушаш ийыште чыла ойлымемым ыштен шуктем гын, моткоч молодец лиям манын шонем.
Лидия Семенова
Фотом еш альбом гыч налме
Следующая публикация
Комментарии 3