Предыдущая публикация
Лӱдыкшыдымӧ да сай качестван корно
Шагал мо тудым вурсымо?..
Ургаш – Роҥго – Морко регионал трассым нацпроект почеш эше 2022 ийыштак олмыкташ тӱҥалме. Эртыше ийлаште 40 километр корным нормативлан келшышын тӧрлымӧ, тений эше 9 километрым уэмдыме.
Корнын чумыр кужытшо – 55,2 километр, тыгодымак 16-шо гыч 25-ше километр марте ужашыже тыгыде кӱм оптыман гына лийын. Лачак тушто корно эре лакылаҥын, ночко жапыште – поснак. Сандене автомобиль дене кудалыштше-влак деч чӱчкыдынак вуйшиймашым колаш пернен. Тидым шотыш налынак, тудым эксперимент шотан у технологий дене олмыкташ келшыме. Корныш тыгыде кӱм, ошмам да шаргӱм оптен, аралтыш шот дене битум да минерал йӧршан вартыш дене леведме. Тидыже тудым кужу жап нормативлан келшышын кучаш полша.
Олмыктымо участкын кужытшо – 9,1 километр, акше – 133,2 миллион теҥге.
Специалист-влак участкым эскераш тӱҥалыт. Тушто кучылталтше технологий ӱшаным сула гын, транспорт шагал коштман да тыгыде кӱм шарыман корнылаште тудо ончыкыжат кучылталташ тӱҥалеш.
Ушештарена: тиде трассе Советский ден Морко районлам ушен шога. Тудым олмыктен уэмдыме деч вара корно палынак саемын да лӱдыкшыдымӧ лийын, а тӱҥжӧ – рӱдола марте корно кӱчыкемын.
Юрий ИСАКОВ яямдылен
Фотом «Марийскав
тодор» ГКУ деч налме
Следующая публикация
Нет комментариев