Йоча школыш куанен коштшаш 🏫

Южо ялысе школыш пурен шогалатат, шӱлык кумыл авалта: йоча шагал, туныктышо-влак огыт сите, оралтыжат тошто. Оршанке район Кугунур кыдалаш школышто – йӧршеш вес сӱрет. Тушто илыш дене тӧр каят, республикыштат ты школ палыме. «Шонанпыл» образцово-фольклорный ансамбльжак мом шога!
2018 ий годсек ты школышто директорлан Г.А.Садовина ышта. Тылеч ончыч тудо марий йылмым да литературым, англичан йылмым да ИКН-ым туныктен. Галина Александровна, ӱдыр-рвезе-влак школыш куанен коштышт манын, ятыр тырша.