Предыдущая публикация
ЙОШКАР-ОЛАЛАН - 440 ий
Флакон-пӧрт
Йошкар-Оласе Эшкинин уремыште верланыше 2-шо номеран пӧрт шукертак рӱдолан визитный картычкыжлан шотлалтеш. Калыкыште тудым утларакше «Флакон» маныт.
Ты зданийын кӱкшытшӧ 85 метрыш шуэш. Тудым А.Галицкийын проектше почеш нӧлтымӧ. Йошкар кермыч гыч чоҥымо 18 пачашан пӧрт торашке волгалтеш. Ойыртемалтше зданий шуко функциянлан шотлалтеш. Тудын икымше ден кокымшо пачашыштыже мужыраҥме полат лийын. Полат кӧргыштӧ лопка тошкалтыш торжественный церемонийым эртараш лачшым келшен толшылан шотлалтын.
Латныл пачашыште 112 илыме пачерым ыштыме. Кӱшыл ужашыштат кок пачашым келыштарыме. Тушто бар, 65 еҥлан йӧнештарыме кафе, смотровой площадке лийыныт. Тудыжо Моско оласе Останкино телебашньым да «Седьмое небо» рестораным ушештара. Тыгай зданийлан ныл лифтым да вентиляций системым обслуживатлыше, кӱлеш оборудованийым вераҥдыман посна пӧлка кӱлын. Садлан электрооборудованийын монтаж шотышто пашаж дене специалист-влак тыршеныт.
Зданийым чоҥымаште республикысе 15 подрядный организаций тыршен. Пӧрт чот кӱкшӧ улмылан кӧра кермычым опташ ӱдырамаш-шамычым налын огытыл. 1989 ийыште зданийым чоҥен шогалтеныт. Жап эртымеке, икымше да кокымшо пачашын озашт вашталтын. Тыге мужыраҥме полат вес зданийыш куснен, а кӱшыл пачашыште верланыше кафе олмеш коммерческий фирме-влакын офисыштым вераҥденыт. Тӱҥжӧ – флакон-пӧртын кӱкшытшӧ тачат Йошкар-Олам сылнештара. А Изи Какшан эҥер сер воктене тыгай кӱкшака зданийым нӧлтымаш оласе архитектурын пашашкыже кугу ойыртемым пуртен.
Следующая публикация
Нет комментариев