Предыдущая публикация
Լա լիգայի 22-րդ տուրում մադրիդյան դերբիում «Ատլետիկոյի» նկատմամբ տոնած նվազագույն հաշվով հաղթանակից հետո Զինեդին Զիդանը հայտնվեց «Սանտիագո Բերնաբեուի» մամուլի սրահում ու պատասխանեց լրագրողների հարցերին:
Ծանր դերբիի մասին.
«Մենք գիտեինք, որ մադրիդյան դերբիները միշտ անզիջում և բարդ են լինում: Անընդհատ պայքարում էինք ու փորձում սրություն հաղորդել, սակայն «Ատլետիկոն» այն թիմն է, որը միշտ կոմպակտ ու վստահ է գործում պաշտպանությունում: Առաջին կեսի մի քանի դրվագում էլ տհաճություններ պատճառեցին մեզ, սակայն շատ ուրախ եմ, որ ի վերջո հաջողվեց 3 միավոր վաստակել»:
Ընդմիջմանը կատարած փոփոխությունների մասին.
«Չեմ պատրաստվում պատմել ձեզ, թե ինչ քննարկում տեղի ունեցավ հանդերձարանում, սակայն պետք է փաստեմ, որ ինձ դուր չի գալիս ընդմիջմանը փոփոխություններ կատարելը: Այնուամենայնիվ, զգացինք, որ գնալով կորցնում ենք խաղի թելը, ու դա իմ մեղքն էր, ոչ թե խաղացողներինը: Փոփոխությունները տվեցին իրենց արդյունքն ու սկսեցինք ավելի ինստենսիվ գործել հարձակման գծում: Կարող եմ ասել, որ «Ատլետիկոն» լավ խաղաց առաջին կեսում, իսկ մենք՝ երկրորդում: Հիացած եմ ֆուտբոլիստներիս նվիրվածությամբ»:
Վինիսիուսն ու Մենդին ձախ թևում.
«Նրանք երկուսն էլ ֆանտաստիկ աշխատանք կատարեցին, ու խփված գնդակն այդ ամենի արդյունքն էր: Նույնը կարող եմ ասել Լուկասի ու Կարվախալի մասին: Աջ թևը ամբողջությամբ նրանց տիրապետության տակ էր գտնվում»:
Պաշտպանության մասին.
«Այստեղ պետք է պաշտպանվեն բոլորը: Երբ կորցնում ենք գնդակը, թիմի յուրաքանչյուր ֆուտբոլիստ սկսում է պրեսինգի դիմել: Վստահ եմ, որ ոչ միշտ ենք փայլուն խաղ ցուցադրելու, ու դա նորմալ է: Ուրախ եմ, որ այսօր հաջողությունն ուղեկցեց մեզ»:
5 կիսապաշտպանով սխեմայի մասին.
«Այս դասավորությամբ շատ հաջող գործեցինք «Վալենսիայի» դեմ սուպերգավաթային խաղում: Ոչինչ չփոխեցինք նաև եզրափակչում: Այս հանդիպման առաջին կեսի անհաջող խաղն իմ մեղավորությունն էր: Ֆիզիկապես դժվար էր մտնել նմանատիպ ռիթմի մեջ: Մեր ընտրությունը կանգ առավ Կրոսի ու Իսկոյի վրա, սակայն չեմ սիրում մատով ցույց տալ ֆուտբոլիստներիս կամ ինչ-որ սխալներ նշել: Նրանք երկուսն էլ լավագույններից են:
«Ատլետիկոյի» պահանջած 11-մետրանոցի մասին.
«Ես խախտում չեմ տեսել: Ինչպես միշտ՝ չեմ մեկնաբանի այն դրվագը, որն իմ տեսադաշտից հեռու էր: Կարծում եմ՝ մրցավարն ամեն ինչ տեսնում էր ու ճիշտ որոշում է կայացրել»:
Բեյլի մասին.
«Նրա հետ ամեն ինչ կարգին է, սակայն այս անգամ այլ ֆուտբոլիստների ընտրեցի: Գարեթը մեր թիմի կարևոր ֆուտբոլիստներից է, շարունակելու է մարզվել, իսկ ինքս նրա հետ հույսեր եմ կապելու մինչև մրցաշրջանի ավարտը»:
Թրեբլի մասին.
«Մենք չենք կենտրոնանում թրեբլի վրա: Հաղթել ենք հերթական խաղում ու շատ ուրախ ենք: Դեռ շատ անելիք ունենք, ու մրցաշրջանի գլխավոր հատվածն առջևում է: Ընդամենը նվաճել ենք սուպերգավաթը. մյուս մրցաշարերում բարդ պայքար է սպասվում»:
#ZinedinZidane ◀ ▶ #CR7
Следующая публикация
Нет комментариев