Предыдущая публикация
САЙГЪЫЛЫ ЮРТДАШЛАРЫМ!
Базы окъуйыджыларымыз бу саифемнинъ адыны «Къырым Эли» деп адландыргъанымнынъ себебини сорайлар менден. Ашагъыда бу меселе узеринде бир къач фикир ортагъа къояджагъым.
Къарасувбазардан Эски Къырымгъа кеткен ёлда Багъча Эли (шимдики ады — Богатое) коюни эпинъиз биледирсинъиз менимдже. Шу койнинъ автостанциясында 15-20 йыл эвель бир къафе бар эди. Къафенинъ витринасында буюк арифлеринен эки тильде онынъ ады язылгъан эди: «Багъча Эли — Руки сада».
Куньлерден бир кунь кафенинъ янында машинаны токътатып ичерсине кирдим де кафенинъ сабысыны (хозяин) корьмек мумкюнми, деп суалиме о ерде булунгъан къадыны не истегенимни сорады.
Мен: «Багъча Эли не олгъаны анълашыла, амма Руки сада, не демектир, аджеба?» - сорадым ондан.
Къадын тааджипленерек: «Руки сада — бу Багъча Элининъ русчагъа терджимеси ола да» - деди.
Мен онъа: «Къардашым, ойле дегиль. Тюркий тиллерде «эль» сёзюнинъ бир къач манасы бар: 1. къол; 2. дияр, мемлекет (страна, край, местность) ве 3. халкъ. Багъча Элине кельгенде экинджи манада ишлетиле. Яни: Край садов. Коктебель къасабасынынъ ады учь къысымдан ибарет олгъаны белли: Кок+тёбе+эль = Край голубых вершин. «Эль/эли» къысмынен къурулгъан даа бир сыра койлер бар Къырымда: Джума-Эли, Тав-Эли (Тавель), Бий Эли ве иляхре. Дженктен эвель Джанкой ве Ленин районларында Къырым Эли адыны ташыгъан эки кой олгъаны белли. Демек ки, Къырым Эли дегенимиз — Страна Крым демектир.
(Девамы оладжакъ)
Следующая публикация
Нет комментариев