Предыдущая публикация
To tirik ekansan...
To tirik ekansan: kurash, ishla, yon!
To tirik ekansan: sev, sevil, quvon!
To tirik ekansan: izla, qidir, top!
To tirik ekansan: intil, yuksal, chop!
To tirik ekansan odamday yigʻlab,
Odamday sevinib, qaygʻurib yasha!
Sevdingmi, yoringni dadil qoʻltiqlab,
Odamli koʻchadan odiming tashla!
Dard-alam oʻtganda oshkor yosh toʻkib,
Quvonsang oshkora xandon otib kul!
Dushmaning qaddini beshafqat bukib,
Doʻstingga tuta bil dasta-dasta gul!
Doʻstlaring qoʻl siqib, nurga choʻmganda
Qalb tafting kaftida lovullab qolsin.
Vaqt yetib koʻzingni mangu yumganda
Sen yurgan koʻchalar huvillab qolsin!
Shuxrat
Следующая публикация
Нет комментариев