Илаһи ҡөҙрәт

Төрлө сүрәткә инә һәм шул уҡ ваҡытта үҙе булып ҡала белә ул. Һөйкөмлөлөк, талант, көслө холоҡ, нескә харизма был актрисаның үҙен дә, героиняларын да ниндәйҙер ҡабатланмаҫ үҙенсәлек менән балҡыта. Сәхнәлә лә, тормошта ла, үҙ-ара мөнәсәбәттәрҙә лә өлгө алырҙай һоҡланғыс шәхес ул. Заманыбыҙҙың күренекле актрисаларының береһе, Башҡортостандың халыҡ артисы Физәлиә Рәхимова-Ғәлина яңы йылда күркәм юбилейын ҡаршылай. Уның Илшат Йомағолов исемендәге Стәрлетамаҡ башҡорт драма театры сәхнәһендә ижад иткән ялҡынлы ролдәре һәм «Күңелле йәшәйбеҙ», «Сируси» кеүек популяр сериалдарҙағы мауыҡтырғыс образдары халыҡ һөйөүен яулаған.