Предыдущая публикация
TORIQ SURASI
Bu sura ham Makka suralaridan bo‘lib, o‘n yetti oyatdir.
Bu sura har bir insonning qilgan amallari maxsus farishtalar tomonidan muntazam yozilib borilishi; Qiyomat kunida jamiyki xaloyiq qayta tirilishi haq ekanligi; Qur’oni Karimning haq bilan botilni ajratguvchi So‘z ekanligi va Alloh taolo buyurgan dinga qarshi turli hiyla-nayranglar qilish ko‘chasiga kirgan kimsalar bir oz muhlatdan so‘ng o‘z qilmishlariga yarasha jazo olishlari muqarrarligi haqidagi mavzular atrofida so‘z boradi.
Suraning nomi bo‘lmish «Toriq», so‘zi «Tungi yo‘lchi — ya’ni, yulduz» ma’nosida kelgandir.
بِسْمِ اللَّهِ الرَّحْمَٰنِ الرَّحِيمِ
Mehribon va rahmli Alloh nomi bilan (boshlayman).
۱.
وَالسَّمَاءِ وَالطَّارِقِ
1. Osmonga qasam, tungi yo‘lchiga qasamki,
۲.
وَمَا أَدْرَاكَ مَا الطَّارِقُ
2. (Ey Muhammad), siz tungi yo‘lchi nima ekanini qaerdan ham bilar edingiz.
۳.
النَّجْمُ الثَّاقِبُ
3. (U) uchar yulduzdir.
۴.
إِنْ كُلُّ نَفْسٍ لَمَّا عَلَيْهَا حَافِظٌ
4. Har bir jonning ustida (uning qilgan barcha amallarini) yod olguvchi (farishta) bordir.
۵.
فَلْيَنْظُرِ الْإِنْسَانُ مِمَّ خُلِقَ
5. Endi inson o‘zining nimadan yaralganiga bir boqsin!
۶.
خُلِقَ مِنْ مَاءٍ دَافِقٍ
۷.
يَخْرُجُ مِنْ بَيْنِ الصُّلْبِ وَالتَّرَائِبِ
6-7. U (erkakning) beli bilan (ayolning) ko‘krak qafasi o‘rtasidan otilib chiquvchi bir suvdan yaralgan-ku!
۸.
إِنَّهُ عَلَىٰ رَجْعِهِ لَقَادِرٌ
۹.
يَوْمَ تُبْلَى السَّرَائِرُ
8-9. Shak-shubhasiz (Alloh) uni sizlar fosh qilinadigan (Qiyomat) Kunida qayta tiriltirishga qodirdir.
۱۰.
فَمَا لَهُ مِنْ قُوَّةٍ وَلَا نَاصِرٍ
10. Bas, (u Kunda inson) uchun (Allohning azobini qaytarguvchi) biron kuch ham, biron yordamchi ham bo‘lmas!
I z o h. Demak har bir inson o‘zini bir tomchi suvdan yaratishga qodir bo‘lgan Alloh uni Qiyomat kuni qayta tiriltirishga ham qodir ekanini o‘ylab, kuch-quvvatining borida imon-e’tiqod va yaxshi amal bilan o‘sha Kunga hozirlik ko‘rsin.
Mazkur oyatlarda Qiyomat haqida xabar berilgach, endi mana shu xabar kelgan Qur’oni Karim qanday kitob ekani bayon qilinadi.
۱۱.
وَالسَّمَاءِ ذَاتِ الرَّجْعِ
11. Qayta-qayta tushguvchi (yomg‘ir) egasi bo‘lmish osmonga qasam;
۱۲.
وَالْأَرْضِ ذَاتِ الصَّدْعِ
12. (O’sha yomg‘ir sababli) yorib chiqquvchi (don-dun, o‘t-o‘lan) egasi bo‘lmish yerga qasamki,
۱۳.
إِنَّهُ لَقَوْلٌ فَصْلٌ
13. Shak-shubhasiz u (Qur’on haq bilan botilni) ajratguvchi So‘zdir.
۱۴
وَمَا هُوَ بِالْهَزْلِ
14. U hazil (ya’ni, asossiz, behuda so‘z) emasdir.
۱۵.
إِنَّهُمْ يَكِيدُونَ كَيْدًا
15. Albatta (kofirlar Muhammad alayhis-salomga qarshi turli) hiyla-nayrang qilurlar.
۱۶.
وَأَكِيدُ كَيْدًا
16. Men ham bir hiyla qilurman (ya’ni ularning hiyla-nayranglariga munosib jazo berurman).
۱۷.
فَمَهِّلِ الْكَافِرِينَ أَمْهِلْهُمْ رُوَيْدًا
17. Bas, (ey Muhammad), siz ularga ozgina vaqt-muhlat bering (ya’ni siz bir oz shoshmay turing, mayli ular bugun dinu iymonga qarshi qo‘llaridan kelganini qilsinlar, ertaga Qiyomat qoyim bo‘lganida, albatta, qilmishlariga yarasha jazolarini olurlar)!
Следующая публикация
Нет комментариев