Предыдущая публикация
🤲😢 *ТАВБУ*
بسم اهلل الرمحن الرحيم
Астагъфируллагь, РахIман, тIолго мунагьаздасан,
Мун рази гьечIебщинаб фигIлу-къавлуялдаса,
Дудаса ракI гъафуллъун кIалъараб кIалалдаса,
Бахъараб хIетIалдаса, бегьараб квералдаса!
Мун разияб гурелде балагьараб бердаса,
РагIизе хIарамалде гIинтIамун чIеялдаса,
Дудаса ракI гъафуллъун биччараб хIухьладаса,
Дун квешлъи гьабулесда тIад рекъон чIеялдаса!
Астагъфируллагь, тавбу, тана, Аллагь, нижеца
Теян амру гьабурал киналгоги квешлъаби.
Гьариларо, БетIергьан, тIаса лъугьа нижеда,
Дур шаргIалъул хIукмаби хIакъирлъулел гIамалал.
Мун цо вукIин лъаниги лъаларелгун хьваданин,
ЛъикIлъилъун бадал гьаре гьарунщинал мунагьал!
Гьабураб гIамал бихьун гIазаб букIин лъаниги,
ГIассилъанин Дуде ниж, гурхIа, Аллагь, нижеда!
Как-кIал загIиф теларо, закат-сахI тIобитIила,
ТIад ругел хIукъукъазул хIисаб бацIцIад гьабила.
ХIарамалъе мугъ кьела, бокьухъе нафс теларо,
Тавбуялда даимлъун Дуде руссун рукIина.
Гьереси-мацI жибго тун жахIда-иблис нахъчIвала,
ЧIухIдае гьава мерхьун гьарила Дуде аман.
Гьидаят тIалаб гьабун ТIагьаясде ахIила,
ХIакъав Дур Расуласде салат гIемер битIила.
Суннатаб кодоб босун карагьатаб рехила,
Камилаб иманги лъун Ислам кIодо гьабила.
КIудал мунагьаздехун хивалго гьабиларо,
Хвалил пикру гьечIого, чIобого ракI теларо.
Я Рабби, нижер Аллагь, ахIи буго Дудехун
АхIмадил умматалъе ургъел бигьа гьабеян!
Балагьал тIаса росун, тIаде рахIматал риччан,
ТIагьал рухIалъе гIоло гурхIел цIикIк1ун гьабеян
Гьаб ахир заманалъул загIифал нижер рухIал
ЖужахIалъул цIедаса цIуне Дуца, БетIергьан!
Дур цIобалъул гIатIилъи гIурхъи гьечIеб бугелъул,
Гьалмагъ гьечIеб рукъалъул къварилъи тIаса босе!
ТIолго муъминзабазул рекIелъе иманги тIун,
Аллагь, Мунан ахIулеб хIухьал къотIизе тоге!
АхIмадгун данделъулел даражабиги рикьун,
РухI босулеб сагIаталъ сагIадат насиб гьабе!
Тавбуялъул рагьу къан къварид гьаруге, Аллагь,
Ахир заманаялъул гIаламат тIатун бугин!
Тавбу, астагъфируллагь, щукру алхIамдулиллагь!
Ла илагьа илла ллагь МухIаммад расулу ллагь.
📚Сагlид-афанди къ.с.
*МАВЛИДАЛ*
Следующая публикация
Нет комментариев