Предыдущая публикация
ЭСКИ ЙИЛНИНГ ЭНГ СЎНГГИ КУНИ
Ташвишлардан толиб кетмоқда
Ким рози, ким нолиб кетмоқда
Ортда бир йил қолиб кетмоқда
Эски йилнинг энг сўнгги куни.
Ошхонадан бери келмас ёр
Дастурхонда не десангиз бор
Бу сафар ҳам йўқламади қор
Эски йилнинг энг сўнгги куни.
Кўча кезар эркаклар сархуш
Янги йилни кутар кўриб туш
Газак бўлар қанча қўчқор, қуш
Эски йилнинг энг сўнгги куни.
Кимни бузган, кимни тузатган
Кимдан олиб кимга узатган
Кўпни кутган, кўпни кузатган
Эски йилнинг энг сўнгги куни.
Ер қарсиллаб, товланар ҳаво
Одат қилдик энди йўқ даво
Бозорларда баланд нарх-наво
Эски йилнинг энг сўнгги куни.
Келинчакдек безанган арча
Либоси зар, балдоғи шарча
Бутун йилдан қолган бир парча
Эски йилнинг энг сўнгги куни.
Янги йилнинг илк санаси дам
Икки, учи, тўртинчиси ҳам
Камҳарж сарак, кўпҳарж ҳотиржам
Эски йилнинг энг сўнгги куни.
Кеч тушмасдан жомлар жаранги
Турфа рангда чироқлар ранги
Ўтган йили бўлган яп-янги
Эски йилнинг энг сўнгги куни.
Ташвишлардан толиб кетади
Ким мағлуб, ким ғолиб кетади
Ортда бир йил қолиб кетади
Эски йилнинг энг сўнгги куни.
Следующая публикация
Нет комментариев