Севишдан ҳам тўхтаркан одам.

Севишдан ҳам тўхтаркан одам,
Яшар экан дард ва туйғусиз.
Хаёлларга берилмай бир дам,
Яшар экан бирор орзусиз.
Севишдан ҳам тўхтаркан одам,
Ташвишларга кўмилиб узга.
Ўйланг ахир, дунё бири кам,
Такрор-такрор берилмас сизга.
Севишдан ҳам тўхтаркан одам,
Юрагига буйруқлар бериб.
Буйруқ бериб ҳаётига ҳам,
Яшар экан кўксини кериб.
Севишдан ҳам тўхтаркан одам,
Дардсиз тошга ўхшар экан у.
Кўзлари ҳеч бўлмас экан нам,
Севгисиз ҳам яшар экан у.
Севишдан ҳеч тўхтаманг, дўстлар,
Муҳаббатга ташнадир дунё.
Дардсиз тошга ўхшаманг, дўстлар,
Қолиб кетар саҳнадир дунё… Dilbek