Улкан қоялардан камалакмисол товланиб тушаётган беназир ва бебаҳо сув баҳру-дилингизни очади.

Унга қараб ҳузурланасиз, кўзлар қувнайди. Тоза ҳаводан тўйиб-тўйиб нафас олгингиз келади. Жануб тафтидан бироз бўлсада, ором олишга интилган юртдошларимиз сўлим, боҳаво бу масканга тез-тез келиб туришади.
Баландлиги қарийиб 150, ёйсимон шаклдаги эни 80 метрча келадиган шаршара тошдан-тошга урилиб, киши руҳиятини аллалайди. Сумбула ўтлар баргини ювиб, шокила-шокила бўлиб тушаётган оби-ҳаёт юрт гўзалликларини янада кўз-кўз қилаётгандек… Азим ва кўркам тоғлар, кўз илғамас чўққиларга қараб, юртимиз табиатига яна бир бор тасанно айтасиз.
-Шаршаранинг тепа қисми адирликлардан иборат Тоғдан шарросдек тушаётган ҳаёт чашмаси қишда бироз камайса, эрта баҳордан яна чор-атрофга ўзининг гўзаллигини кўз-кўз қила бошлайди.