Бишкекте акыркы үч айдан бери "Комуз Party" аттуу иш чара өтүүдө.

Анда комуз ышкыбоздору паркка чогулуп, күү чертип, ыр ырдашат.
Жаш активисттердин демилгесинен жаралган бул саамалык ар бир айдын төртүнчү күнүндө "Ататүрк" паркында уюштуруулууда. Соңку үч иш-чарага комузда кол ойноткон чоңдордон жаш жеткинчектерге чейин катышты.
"Комуз Party" иш-чарасынын уюштуруучуларынын бири Сайкал Малик кызынын айтымында, комузчулардын акысыз концертин ар бир шаар тургуну келип көрсө болот.
Бул саамалык алгач 4-июлда башталган. Жаштардын демилгесин "Устат-шакирт" коомдук корунун комузчулары колдоого алышкан.
Адатта комуз ышкыбоздору кечке маал жолугушат. Айрым учурда "Комуз Party" караңгы киргенге чейин уланат.