Тўрт фаслга монанд инсон тақдири

Туғилиш, гуркираш баҳорга қиёс
Куч қувватга тўлиқ, етуклик даври
Гўёки эслатар келганини ёз
Экканинг етилиб, кирса ҳосилга
Билгинки, келибди умрингнинг кузи
Қишлигинг ғамлагин, қолмай ғофилга
Қиш кириб қолганин сездирар ўзи
Ниначидек доғда қолмайин десанг
Умринг баҳорида ўргангин ҳунар
Ҳунарли хор бўлмас агарда билсанг
Ҳунар-ла инсоннинг ризқи ҳам унар
Умрингнинг ёзини сарф қил меҳнатга
Ҳосилинг бехато униши учун
Бор кучингни сарфла, қолма ғафлатга
Хирмонга барака қўниши учун
Экканинг ўрарсан келганида куз
Арпа эккан сира буғдой ўролмас
Шу сабаб бўл мудом хушфеъл, ширинсўз
Бўлмагин золиму, худбин, кўролмас
Умринг боғи гўзал бўлмоғи учун
Танлагин ўзингга муносиб йўлдош
Ҳосилдан кўнглингнинг тўлмоғи учун
Заҳматлар чексангда айлагин бардош
Куч-қувват борида ғамла қишлигинг
Қиш учун қилганинг бу эзгу амал!
Ёшлигинг билгинки беташвишлигинг
Ташвишинг кўпаяр кексайган маҳал
Кимки ота-она дуосин олган
Хор бўлмагай асло қарилик чоғи
Нописанд бўлганлар ғафлатда қолган
Сира ҳам гулламас умрининг боғи
Фарзанд ёққусидир уйинг чироғин
Эгамдан сўрагин солиҳ бўлсин деб
Кўрсатма деб ёлвор сира ҳам доғин
Камолини тила кўнглим тўлсин деб
Ўзингга неники раво кўрмасанг
Тилама бировга бу ҳам яхшилик
Кимга вафо қилиб, вафо кўрмасанг
Ранжима, билгинки, бу ҳам кўргулик
Яхшию, ёмонинг етаклаб бир кун
Борсакелмас сари бир кун йўл олсанг
Неки қилган бўлсанг қайтгуси бутун
Кўражаксан албат сабр қилолсанг
Сўзимни муҳтасар қиламан дарров
Беҳуда ўтказма ҳатто бир онинг
Адойи Меҳриддин бўлма бепарво
Сергак бўл, токи бор экан имконинг!