Предыдущая публикация
Дила дурхъаси давла
Салимат ХIяжиева,
Р.ХIямзатовла уличилси республикала Миллатла библиотекала хIянчизар
Гьаларван даргантани гIяхIцад далдуцуни дурадеркIиб нешла мезлис хасдарибти. Дарган мез мяхIкамдирнилис ва гьаладяхI дашахънилис хасбарибси Сергокъалала районна Россияла Игит МяхIяммад НурбяхIяндовла уличилси кIиибил школализиб «Нешла мез – дила давла» ибси шадлихъла балбуц дураберкIиб.
Балбуц дурабуркIнила мурад сабри нешла мез руркъниличи ва илди мяхIкамдирниличи, вегIла халкьла тарихличи, культураличи, гIядатуначи бучIантала пикри бяхIчиаахъни ва илдачи диги адикьни.
Балбуц абхьиб ва бузахъи нешла мезла ва литературала мугIяллим Изумруд МяхIяммадовани.
Цалабикибтачи саламтачил дугьаризур школала директор ГIябдуряхIимова Индира МяхIяммадсягIидовна.
«Дарганти.
Тарих ва ишхIелла манзил» ибси докладличил гъайухъун районна жамигIятла хIяракатчи Улахъай Улахъаев.
Балбуцличиб гIурра гъайбухъун ДР-ла писательтала Союзла даргала секцияла руководитель М.БяхIяммадов, ДНЦ РАН-на лексикологияла ва лексикографияла отделла заведующий Х.Юсупов, поэт И.Идзиев, хьунул адамтала Советла председатель Э.ГIяйсаева, районна архивла заведующая Б.СягIидова, районна ЦБС-ла МКУ-ла директор З.ГIямарова ва цархIилти. Илдани бурулри жамигIятла гIямрулизиб нешла мезла кьадриличила. Балбуц дураберкIибтасра илдани халаси баркалла багьахъур.
Илдани бурни хIясибли, илдигъунти далдуцуни дурадуркIниличирли нешла мезличи бучIантала ва лебилра биштIа-халатала диги имцIадирар, вегIла халкьанала, ВатIа тарихличи пикри бяхIчииу.
Районна МКДЦ-ла хIянчизартани, хаслира Гьидаят МяхIяммадовани ва Муслимат Ханакаевани делчIунти далуйтани балбуц лебгIеб жагабарилри.
Илкьяйдали, балбуцличир бутIакьяндеш дариб, далуйти делчIун, даргала поэтунала назмурти дуриб ГIямарла Батирайла уличилси Даргала музыкала-драмала театрла гIяртистуни Салимат Шагьмандаровани ва Мухтар НухIовли.
Литературала-музыкала халаси программаличил ва хореографияла композицияличил школала бучIантанира шадлихъличир бутIакьяндеш дариб ва нешла мезличил далуйтира назмуртира делчIун.
Балбуц ахирличи бикибхIели, лебилра цалабикибтас миллатла бизити берклуми гьалидихьиб.
Следующая публикация
Нет комментариев