შესაძლოა, უეფამ ორი თურქული კლუბი მოკვეთოს ევროტურნირებიდან: თასის ფინალისტი “ესკიშეჰირსფორი” და მეხუთე ადგილზე გასული “სივასფორი”, რომელსაც ლეგენდარული ბრაზილიელი რობერტო კარლოსი წვრთნის.

“სივასფორი” ვერ გადიოდა ევროპის ლიგაზე, თუმცა “ესკიშეჰირსფორის” დისკვალიფიკაციის შემთხვევაში დაიკავებდა ევროპაში ადგილს. ახლა კი, დიდი შანსია, ორივე გუნდი მოიკვეთოს – მიზეზი გარიგებულ მატჩებში მონაწილეობაა.
კონკრეტულად რობერტო კარლოსი არაფერ შუაშია: მატჩი, რომელიც უეფას საეჭვო მატჩთა სიაში მოხვდა და მოგვიანებით დამტკიცდა, რომ მართლაც გარიგებული იყო, ბრაზილიელის გუნდში მისვლამდე, 2011 წელს გაიმართა. გაირკვა, რომ “სივასფორს” უბრძოლველად დაუთმია მოგება “ფენერბახჩესთვის”.
თუ “ესკიშეჰირსფორსა” და “სივასფორს” დისკვალიფიკაციას მისცემენ, ევროპის ლიგის საკვალიფიკაციოზე ავტომატურად გავა შოთა არველაძის “ქასიმფაშა”, რომელიც ჩემპიონატში მეექვსე ადგილზე გავიდა.