Сыре авань моро

https://vk.com/wall9490099_4222 Сыречись теть нежеди,

Тон а учат, а сон сы.
Кедеть-пильгеть сэредить,
Пукштсо пееть певерить.
Чама бокат сормсевить,
Покш човарсо нерькстневить,
Пилень потомсть, а марить,
Сельмень беряньстэ неить.
Чавачамос мон варчнян,
Амазы ломань неян.
Кедезэнь саян палкà,
Сыречинтень лездамка.
Пенсиянть получаса,
Мелянь улкос рамсевса.
Ансяк пенсиянть кандсызь,
А нейсак, кода сайсызь.
Эсеть лангс весе пижнить,
Кулаксост пулякс выжныть.
Вай, козонь ней мон молян?
Вай, цёранстэнь мон молян.
Урьванстэнь а эряван.
Тейтерень кедьсэ аштян,
Вай, содамонтень мешан.
Эх, сыречи, кажовчи,
Кашт лангс кияк мутанзат,
Тостояк а варштянзат.
Авлинь цире, циредян,
Авлинь цере, цередян.
Эх, экакшкеть, каткинеть,
Кода мон тынк те икеле
Тетявтомо кастыдизь.
Салазкесэ пенгть ускинь,
Лембе кудо тенст уштынь.
Копорьсэ кором кандынь,
Истя скалнэм андылинь.
Сюро пондо важодинь,
Нарбунасо мон кандынь.
Ней тыненк а эряван,
Лома ломанькс маряван.
Мон эстень тарка муян,
Сырень кудос мон туян.
Куломаськак малав сы,
Пазось кулине максы.
Апак учо сайтянзат,
Оймсемс а нолдатанзат.
Кода вирьга якилинь,
Умарьть ведра кандылинь,
Сизема мон аздылинь.
Ловось солы, кизэ сы,
Вана сась, эйсэнь эжди.
Течи чи, ды ванды чи,
Мезеяк тень а кучи...
***